Home News & Updates Photo တရံးဖိကွံသဝီ,လူၢ်ပျဲ...

တရံးဖိကွံသဝီ,လူၢ်ပျဲၢ်ကီၢ်ဆၣ်,ဖၣ်အၣ်ကီၢ်ရ့ၣ်,ကီၢ်သူလ့ၤ တၢ်မၤလၤကပီၤ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤ

October 6th, 2022  •  Category Photo  •  Author: KECD Staff

ခ့ၣ်အဲၣ်ယူၣ် ကညီဒီကလုာ်စၢဖှိၣ် ကူၣ်သ့ဆဲးလၤဝဲၤကျိၤ ကီၢ်ရ့ၣ်ကီၢ်ဆၣ်တနီၤမၤလၤကပီၤဝဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤဖဲ တနံၤအံၤ လါအီးကထိဘၢၣ်ထီၣ် ၅ သီ ၂ဝ၂၂ နံၣ်အနံၤဝဲအံၤန့ၣ်လီၤ. ကီၢ်ရ့ၣ်ကီၢ်ဆၣ်တနီၤ မၤလၤကပီၤဝဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤ တကဲထီၣ်လိၣ်ထီၣ်ဝဲဘၣ် ခီဖျိ တၢ်ဒုးတၢ်ယၤအိၣ်ဒံးဝဲအဃိန့ၣ်လီၤ.

လၢ တၢ်မၤလၤကပီၤဝဲ ဟီၣ်ခိၣ်ဒီဖျၢၣ် ကၠိသရၣ်မုၢ်နံၤဘျီဝဲအံၤ ကညီကူၣ်သ့ဆဲးလၤဝဲၤကျိၤ လီၢ်ခၢၣ်သး ရဲၣ်ကျဲၤဒီးဆှၢလီၤဝဲ လံာ်ဟ့ၣ်ယုၢ်ဆူ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤ တကးဒံးဘၣ် ကၠိသရၣ် သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤအတၢ်ပၢဆှၢရဲၣ်ကျဲၤဖီလာ် တဖၣ် ဘၣ်တၢ်မၤလၤကပီၤအီၤ အိၣ်ဝဲ ၅ ပတီၢ်န့ၣ်လီၤ.

(၁) ကၠိသရၣ်သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤ ကီၢ်သူလ့ၤ ကၠိပှဲၤထီၣ် ၅ နံၣ်တဖၣ် ဘၣ်တၢ်ဟ့ၣ်လၤဟ့ၣ်ကပီၤအီၤလၢ လံာ်အုၣ်သး, (၂) ကၠိသရၣ်သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤ ကီၢ်သူလ့ၤ ကၠိပှဲၤထီၣ် ၁ဝ နံၣ်တဖၣ် ဘၣ်တၢ်ဟ့ၣ်လၤဟ့ၣ်ကပီၤအီၤလၢ လံာ်အုၣ်သးဒီးတိၢ်ဘီကဘျၣ် တၢ်လၤကပီၤ ပနီၣ်, (၃) ကၠိသရၣ်သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤ ကီၢ်သူလ့ၤ ကၠိပှဲၤထီၣ် ၂ဝ နံၣ်တဖၣ် ဘၣ်တၢ်ဟ့ၣ်လၤဟ့ၣ်ကပီၤအီၤလၢ လံာ်အုၣ်သးဒီးစ့ကဘျၣ် တၢ်လၤကပီၤ ပနီၣ်, (၄) ကၠိသရၣ်သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤ ကီၢ်သူလ့ၤ ကၠိပှဲၤထီၣ် ၃ဝ နံၣ်တဖၣ် ဘၣ်တၢ်ဟ့ၣ်လၤဟ့ၣ်ကပီၤအီၤလၢ လံာ်အုၣ်သးဒီးထူကဘျၣ် တၢ်လၤကပီၤ ပနီၣ်, ဒီး (၅) ကၠိသရၣ်သရၣ်မုၣ်လၢ အသိၣ်လိတၢ်တပယူာ်ဃီလၢ ကညီကူၣ်သ့ဆဲးလၤဝဲၤကျိၤ ကီၢ်သူလ့ၤ ကၠိပှဲၤထီၣ် ၄ဝ နံၣ်တဖၣ် ဘၣ်တၢ်ဟ့ၣ်လၤဟ့ၣ်ကပီၤအီၤလၢ လံာ်အုၣ်သးဒီးထူတပၢၤ န့ၣ်လီၤ.

ကၠိသရၣ် တၢ်ဖံးတၢ်မၤအံၤ တမ့ၢ်တၢ်ဖံးတၢ်မၤလၢ အညီအဘှါဘၣ်. ထီဘိ ကၠိသရၣ် သရၣ်မုၣ်တဖၣ် ဘၣ်ကွၢ်ဆၢၣ်မဲာ်ဝဲဒီး တၢ်ကီတၢ်ခဲတၢ်ဆီၣ်သနံးလၢကျဲအဘိဘိဒီး တမ့ၢ်စ့ၢ်ကီးတၢ်မၤလၢအန့ၢ်ဘူးန့ၢ်လဲဒိၣ်ဒိၣ်မုၢ်မုၢ်ဘၣ်. ဘၣ်ဆၣ်သနာ်က့ ခီဖျိလၢအဝဲသ့ၣ်တဖၣ်အတၢ်ဟ့ၣ်လီၤသး, တၢ်တူၢ်ခီၣ်တူၢ်ဆါသး, တၢ်သူၣ်အိၣ်သးအိၣ်ဒီး တၢ်ကျဲးစၢးဒုးကူၣ်ဘၣ်ကူၣ်သ့ထီၣ်ဝဲ ဖိဒံဖိသၣ်ဒီးသူၣ်ဘီၣ်သးစၢ်တဖၣ်အဃိ ကညီကူၣ်သ့ဆဲးလၤဝဲၤကျိၤ ဟ့ၣ်လၤဟ့ၣ်ကပီၤအီၤပာ်ပနီၣ်အဝဲသ့ၣ်အတၢ်ဖံးတၢ်မၤဒီးတၢ်ဟ့ၣ်လီၤသးတဖၣ်ဖဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤဝဲအံၤန့ၣ်လီၤ.

ကီၢ်ရ့ၣ်ကီၢ်ဆၣ်ဒၣ်ဝဲစုာ်စုာ်အိၣ်စ့ၢ်ကီးဒီး တၢ်ဟ့ၣ်လၤကပီၤလီၤဆီဒၣ်ဝဲလၢ ကဟ့ၣ်ဆူၣ်ထီၣ်က့ၤ ကညီကၠိသရၣ်သရၣ်မုၣ်တဖၣ်အသးဒီး ကဲထီၣ်တၢ်ကွၢ်လိလၢ ခါဆူညါအဂီၢ်န့ၣ်လီၤ— တနံၣ်အံၤ ကၠိသရၣ်သရၣ်မုၣ်လၢ အဒိးန့ၢ်တၢ်လၤကပီၤ ခဲလၢာ်အိၣ်ဝဲ (၁ဝ၈၂)ဂၤ လၢ ကီၢ်ရ့ၣ် ၇ ဘ့ၣ်အပူၤန့ၣ်လီၤ.

တနံၣ်အံၤ ကညီကူၣ်သ့ဆဲးလၤဝဲၤကျိၤ ရဲၣ်ကျဲၤဒီး မၤလၤကပီၤဝဲ ဟီၣ်ခိၣ်ဒီဖျၢၣ်ကၠိသရၣ်မုၢ်နံၤ ထဲဒၣ်ကီၢ်ရ့ၣ် ၄ ဘ့ၣ်န့ၣ်လီၤ. ကီၢ်ရ့ၣ်တီအူအပူၤမ့ၢ်ဝဲ ဒီၣ်ဖးခိၣ်ဒီးထီတထူၣ်ကီၢ်ဆၣ်, မုၢ်ြတီၢ်ကီၢ်ရ့ၣ်တခီ ကီၢ်ဆၣ်လူၤသီ အပူၤ ထံမူခံဒီးထံက့ၣ်ဒၢ, ကီၢ်ဆၣ်ဒွဲၣ်လိအပူၤ ထံဂီၤထၣ်ဒီးထံသဲလ့, ကီၢ်ဆၣ်ဘုသိၣ်အပူၤ ဘုအါဒၢဒီးထံဘီဖးဒ့န့ၣ်လီၤ. ဒူပျာ်ယာ်ကီၢ်ရ့ၣ်အပူၤတခီ ကီတရံးကီၢ်ဆၣ် လီၤပၢ်သဝီဒီး ဖၣ်အၣ်ကီၢ်ရ့ၣ်အပူၤ ကီၢ်ဆၣ်လူၢ်ပျဲၢ် တရံးဖိကွံ, ကီၢ်ဆၣ်တၢ်ြတဲၢ် ပံၢ်တခးဒီး ကီၢ်ဆၣ်တန့ခၠါတခီမ့ၢ်ဝဲ သ့ၣ်ကတံာ်သဝီန့ၣ်လီၤ.