ကၠိဖိမုၣ်ခွါ ၁ဝ၃ ဂၤ ဘၣ်တၢ်ဆီၣ်သနံးအီၤလၢ ကီၢ်ကၠီၣ်တဲၣ်ပှၤဘၣ်မူဘၣ်ဒါဒီးဆှၢကဒါက့ၤအီၤ

တနံၤအံၤ တၢ်ဒုးကဲထီၣ်လၢ ကီၢ်သူလ့ၤ သုးက့ နီၣ်ဂံၢ်(၆) ဟီၣ်ကဝီၤပူၤဒီး ကညီကူၣ်သ့ဆဲးလၤဝဲၤကျိၤ တၢ်ပၢအဖီလာ် ကညီကၠိဖိလၢ အဃ့ၢ်ပူၤဖျဲးထီၣ်အသးလၢ တၢ်ဒုးတၢ်ယာ်ဟီၣ်ကဝီၤတၢ်လီၤဘၣ်ယိၣ်ဒီး လဲၤဃ့ၢ်အိၣ်ကဒုတစိၢ်တလီၢ်ဖဲ ကီၢ်ကၠီၣ်တဲၣ်အပူၤ ၁ဝ၃ ဂၤ ဘၣ်တၢ် ဆီၣ်သနံးအီၤလၢ ကီၢ်ကၠီၣ်တဲၣ် ပှၤဘၣ်မူဘၣ်ဒါဒီး ဆှၢကဒါက့ၤအီၤဖဲတနံၤအံၤန့ၣ်လီၤ.

ဒ် Social Media အပူၤ တၢ်ဂီၤမူသ့ၣ်တဖၣ်အိၣ်ဖျါထီၣ်ဝဲအသိးတနံၤအံၤထံဒိၣ်ဒီးထံဆူၣ်ဒီး ချံလၢအခီတဲာ် သူမွဲကျိတဘ့ၣ်လၢအစိာ်ဆှၢကၠိဖိတဖၣ် သတူၢ်ကလာ်ချံတကျၢၢ်ကဲထီၣ်အသးသနာ်က့ တၢ်ဘၣ်ဒိဘၣ်ထံးတအိၣ်ဝဲဘၣ်. ဘၣ်ဆၣ် လၢအဝဲသ့ၣ်တၢ်အိၣ်မူအပူၤ ကမ့ၢ်ဝဲတၢ်မံမီၢ်အၢသီတခါလၢ သးပ့ၤနီၣ်က့ၤဝဲတသ့နီတဘျီဘၣ်န့ၣ်ကဲထီၣ်တၢ်တူၢ်ဘၣ်တခါသ့လီၤ. တၢ်ကဲထီၣ်အသးလၢ ချံတကျၢၢ်ဒ်အံၤသနာ်က့ ကၠိဖိလၢ အအိၣ်တ့ၢ်တဖၣ်တၢ်ဆီၣ်သနံးအီၤလၢ ကက့ၤကဒါက့ၤဝဲအဖၢမုၢ်ဒံးလီၤ.

ကတီၢ်အံၤ ကၠိဖိလၢအက့ၤကဒါက့တုၤလၢ ကီၢ်သူလ့ၤ တဖၣ်တၢ်ဘံၣ်တၢ်ဘၢတကပၤ တၢ်လီၤဘၣ်ယိၣ်အိၣ်ဒံးဝဲန့ၣ်လီၤ. ခီဖျိ ကီၣ်ကးသုးပဒိၣ်တဖၣ် ဟဲမၤအါထီၣ်ဝဲတၢ်ဒုးဖဲဟီၣ်ကဝီၤဝဲန့ၣ်အဃိ တၢ်ဒုးဆဲးကဲထီၣ်ဒံးဝဲအဖၢမုၢ်န့ၣ်လီၤ. လၢတၢ်ဘံၣ်တၢ်ဘၢတကပၤ တၢ်လီၤဘၣ်ယိၣ်အိၣ်ဝဲအသိး တၢ်အီၣ်တၢ်အီတဖၣ်စ့ၢ် ကီးတလၢတလီၣ်ဒံးဝဲဘၣ်န့ၣ်လီၤ.

ပဃ့ဒီးဆီၣ်သခူထီၣ် ထံဂုၤကီၢ်ဂၤတၢ်ကရၢကရိဒီး ဂံၢ်ခီၣ်ထံးတၢ်ကရၢကရိ သ့ၣ်ဖၣ်တသ့ဖဲအသ့ လၢကမၤစၢၤပှၤန့ၣ်လီၤ.