ကညီၦိၢ် လံာ်လဲၢ်ဒီးတၢ်ဆဲးတၢ်လၤ တၢ်မၤလိပျၢ်အမူး
၁၉.၅.၂ဝ၂၄ တၢ်မၤဝဲ ကညီၦိၢ်လံာ်လဲၢ်ဒီးတၢ်ဆဲးတၢ်လၤတၢ်မၤလိပျၢ်အမူးဖဲ မဲးလးဒဲကဝီၤ သံၤရံၣ်စၤဒၣ်သီခါဖၠၣ်န့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်မၤအီၤအိၣ်ဝဲသၢပတီၢ် အခီၣ်ထံးတပတီၢ် ဘၣ်ထွဲလၢခိၣ်နၢ်ဟ့ၣ်ဂံၢ်ဟ့ၣ်ဘါဒီးဟ့ၣ်ကူၣ်ဟ့ၣ်ဖးတဖၣ်, ခံပတီၢ်တပတီၢ်တၢ်ဟ့ၣ်လီၤက့ၤဖိသၣ်လံာ်အုၣ်သး,ခိၣ်ဖးန့ၣ်လီၤ. သၢပတီၢ်တပတီၢ် တၢ်မၤန့ၢ်ကၠိဖိသ့ၣ်တဖၣ်တၢ်သူၣ်ဖှံသးညီန့ၣ်လီၤ. လၢတၢ်သိၣ်လိပျၢ်တဘျီအံၤ ကညီကူၣ်သ့ဆဲးလၤဝဲၤကျိၤခၢၣ်စးၦၤဘၣ်မူဘၣ်ဒါတဖၣ်, မဲၣ်လးဒဲကဝီၤကူၣ်သ့ၦၤဘၣ်မူဘၣ်ဒါ,ဒီးလံာ်လဲၢ်ဒီးတၢ်ဆဲးတၢ်လၤကမံးတံာ်,ကၠိသရၣ်သရၣ်မုၣ်သ့ၣ်တဖၣ်, ၦၤမံၤဟူသၣ်ဖျါသ့ၣ်တဖၣ်, ကၠိဖိဒီးကၠိဖိမိၢ်ပၢ်သ့ၣ်တဖၣ် ၦၤနီၢ်ဂံၢ်နီၢ်ဒွးခဲလၢာ်အိၣ်လၢ၂ဝဝ ဂၤဃၣ်ဃၣ်ဟဲဝဲဆူတၢ်မၤလိပျၢ်အမူးန့ၣ်လီၤ.
ကညီၦိၢ် လံာ်လဲၢ်ဒီးတၢ်ဆဲးတၢ်လၤ ၦၤဘၣ်မူဘၣ်ဒါတဖၣ်သူၣ်ဆူၣ်သးဂဲၤလၢ လံာ်လဲၢ်,ပီညါတၢ်လဲၤထီၣ်လဲၤထီဒီးတၢ်ဆဲးတၢ်လၤတၢ်လဲၤထီၣ်လဲၤထီ,တၢ်ကပၢၤဃာ် ကညီအတၢ်မ့ၢ်တၢ်န့ၣ်လီၤ.”သ့ၣ်တဘိန့ၣ်တၢ်ဘိးကၢ်ဝဲညီဒီးမ့ၢ်မ့ၢ်သ့ၣ်တထူၣ်န့ၣ်တၢ်ဘိးကၢ်အီၤတညီဘၣ်အသိး လၢတၢ်မၤလဲၤထီၣ်လဲၤထီလံာ်လဲၢ်ဒီးတၢ်ဆဲးတၢ် လၤအံၤမူဒါအိၣ်ဝဲလၢၦၤကိးဂၤဒဲးအစုပူၤ” အဂ့ၢ် ၦၤဘၣ်မူဘၣ်ဒါ (ဖုသီခါတပါ)စံးဝဲန့ၣ်လီၤ.ဒ်န့ၣ်အသိး တၢ်ကူၣ်ဘၣ်ကူၣ်သ့ခိၣ်နၢ်ခၢၣ်စးသ့ၣ်တဖၣ်ပထံၣ်ဘၣ်လၢအဝဲသ့ၣ်အိၣ်ဒီးတၢ်ပညိၣ်လၢအလီၤပလိာ်ဒီးအဝဲသ့ၣ်န့ၣ်လီၤ. ၦၤဘၣ်မူဘၣ်ဒါတဂၤစံးဝဲ “မုၢ်မဆါတနံၤအံၤ တၢ်ဟ့ၣ်ခီဟ့ၣ်နီၤသူၣ်ဘီၣ်သးစၢ်,ဖိဒံဖိသၣ်သ့ၣ်တဖၣ်လၢလံာ်လဲၢ်ဒီးတၢ်ဆဲးတၢ်လၤလၢ ၦၤတဝၢပူၤအံၤမ့ၢ်တၢ်အလုၢ်ဒိၣ်ၦ့ၤဒိၣ်ဝဲန့ၣ်လီၤ.”
ကညီၦိၢ်တၢ်မၤလိဒ်သိးအံၤဘၣ်တၢ်မၤအီၤၦဲၤထီၣ်(၂၃)ဝီတဝီလၢမဲၣ်လးဒဲကဝီၤပူၤန့ၣ်လီၤ. တၢ်မၤလိ ကညီၦိၢ် လံာ်လဲၢ်ဒီးတၢ်ဆဲးတၢ်လၤတၢ်ရဲၣ်တၢ်ကျဲၤ မ့ၢ်ဒ်သိးတၢ်ပၢၤဃာ်ကညီလံာ်လဲၢ်ဒီးတၢ်ဆဲးတၢ်လၤဒီးတၢ်မၤ လဲၤထီၣ်လဲၤထီပီညါအဂီၢ် န့ၣ်လီၤ. အဃိကညီကူၣ်သ့ဆဲးလၤဝဲၤကျိာ်ထံၣ်ဝဲလၢအကြၢးဝဲဘၣ်ဝဲန့ၣ်လီၤ.
