K-GED ကၠိဖိ သၢဖုတဖု တၢ်ပျၢ်ကၠိအမူး
ပသးခုဃုာ်ဒီးကၠိဖိတဖၣ် ဒီးပပာ်ကဖၢလၢပသးလၢအဝဲသ့ၣ်တဖၣ်အတၢ်ကျဲးစၢးမၤလိတၢ်ဒီးဖျိထီၣ်ဝဲကၠိဂ့ၤဂ့ၤလၢ၂ဝ၂၃-၂ဝ၂၄ တၢ်မၤလိနံၣ်အံၤန့ၣ်လီၤ. ဒီးအဝဲသ့ၣ်တဖၣ်အတၢ်မၤနၢၤအံၤကမ့ၢ်ဝဲနီၣ်ဂၤစုာ်စုာ်တၢ်မၤနၢၤအသိး မ့ၢ်စ့ၢ်ကီးတၢ်မၤနၢၤလၢကညီကူၣ်သ့ဆဲးလၤဝဲၤကျိၤအဂီၢ်စ့ၢ်ကီးတကာ်ဘၣ်လၢပၦၤလုာ်ဒီတလုာ်န့ၣ်လီၤ.ပမုၢ်အဒိၣ်အအါလၢ သူဘီၣ်သးစၢ်လုၢ်ဒိၣ်ၦ့ၤဒိၣ်လၢအဖျိထီၣ်ကၠိတဖၣ်အံၤကဲထီၣ်က့ၤတၢ်ဂံၢ်တၢ်ဘါဒိၣ်ဒိၣ်မုၢ်မုၢ်လၢၦၤတဝၢအဂီၢ်န့ၣ်လီၤ.
၇.၅.၂ဝ၂၄ အနံၤ K-GED batch 3 အိၣ်ဒီးတၢ်ပျၢ်ကၠိအမူးဖဲ ဝ့ၢ်မဲဆီးဟီၣ်ကဝီၤမဲၣ်ပး သဝီန့ၣ်လီၤ. လၢတၢ် ပျၢ် ကၠိအမူးအံၤ ကၠိသရၣ်,သရၣ်မုၣ်တဖၣ်,တၢ်ကရၢကရိခၢၣ်စးသ့ၣ်တဖၣ်,ဒီးကၠိဖိမိၢ်ပၢ်ဒီးသးစၢ်သ့ၣ်တဖၣ်ဟဲပာ်ဖှိၣ်ထီၣ်သးၦၤနီၢ်ဂံၢ်ကအိၣ်ဝဲ(၁ဝဝ)ဂၤဃၣ်ဃၢ်န့ၣ်လီၤ. ဒီးလၢကၠိဖိသၢဖုတဖုတၢ်စံၣ်လီၤကၠိဘျီဝဲအံၤကၠိဖိမုၣ်ခွါလၢအဖျိထီၣ်ခဲလၢာ်(၂၅) ဂၤ န့ၣ်လီၤ. ကွၢ်ကဒါက့ၤကၠိဖိဖျိထီၣ်တဖုဒီးတဖု မ့ၢ်ကွၢ်က့ၤလၢအဝဲသ့ၣ်တၢ်ဂုာ်ကျဲးစၢးအဖီခိၣ် တၢ်မၤလိန့ၢ်တၢ်လံာ်အမးသ့ၣ်တဖၣ် တၢ်လဲၤထီၣ်လဲၤထီအိၣ်ဝဲအဂ့ၢ် ကူၣ်သ့ဆဲးလၤဝဲၤကျိၤနဲၣ်ရွဲၣ်စံးဝဲန့ၣ်လီၤ. ကၠိဖိလၢအမၤလိဘၣ်တၢ်လၢ မုၢ်မဆါတနံၤ အံၤတတဖၣ် မ့ၢ်ထိၣ်သတြီၤဒီးစိၤလၢအပူၤကွံာ်န့ၣ် အဝဲသ့ၣ်အိၣ်ဒီးတၢ်ခွဲးတၢ်ယာ်ဂ့ၤဒိၣ်ဝဲဒိး လၢ တၢ်ခွဲး တၢ် ယာ် ဒ်အံၤအဖီခိၣ်ကၠိဖိသ့ၣ်တဖၣ်အသုတသူဝဲလၢတၢ်ကလီကလီပူၤတဂ့ၤဒီးမ့မ့ၢ်တခီကဟံးန့ၢ်တၢ်ခွဲး တၢ်ယာ်ဒီး မၤလိတၢ်ဆူၣ်ဆူၣ်အဂ့ၢ် ကီၢ်ရ့ၣ်ချၢၣ်လွံၢ်ထူၣ်နဲၣ်ရွဲၣ်စံးဝဲန့ၣ်လီၤ. ၦၤတဝၢလိၣ်ဘၣ်သု(ၦၤကူၣ်ဘၣ် ကူၣ် သ့)အဃိ သုမ့ၢ်အဲၣ်ဒိးထံၣ်တၢ်ဆီတလဲလၢၦၤတဝၢပူၤန့ၣ် သုကဘၣ်မ့ၢ်ၦၤလၢအဆီတလဲတၢ်အဂ့ၢ် သရၣ် ကပီၤထူစံးဝဲန့ၣ်လီၤ.
ခိၣ်နၢ်လုၢ်ၦ့ၤဒိၣ် လၢအပာ်လုာ်ပာ်ၦ့ၤတၢ်ကူၣ်ဘၣ်ကူၣ်သ့ဒီး ဃုန့ၢ်ကျဲလၢၦၤသူၣ်ဘီၣ်သးစၢ်သ့ၣ်တဖၣ်ကဒိးန့ၢ်တၢ်ကူၣ်ဘၣ်ကူၣ်သ့အဂီၢ်,ဒ်န့ၣ်အသိးသူၣ်ဘီၣ်သးစၢ်လုၢ်ဒိၣ်ၦ့ၤဒိၣ်သ့ၣ်တဖၣ်အတၢ်ကျဲးစၢးအံၤကဲထီၣ်တၢ်ဘျုးတၢ်ဖှိၣ်လၢပၦၤတဝၢအဂီၢ်ဒိၣ်ဒိၣ်မုၢ်မုၢ်န့ၣ်လီၤ. ဒ်ၦၤကလုာ်တၢ်လိၣ်အသိး ကၠိဖိလၢအဖျိထီၣ်တဖၣ်ပနာ်လၢအဝဲသ့ၣ်ကမၤၦဲၤၦၤတဝၢအတၢ်လိၣ်တဖၣ်တဂၤလၢအသနၢၣ်ဒီးတနီၤကဃုအါထီၣ်တၢ်ကူၣ်ဘၣ်ကူၣ်သ့လၢတၢ်လီၢ်အဂၤဒီးဟဲက့ၤမၤသကိးတၢ်လၢအၦၤတဝၢအဂီၢ်န့ၣ်လီၤ.
K-GED ကၠိအံၤ တၢ်ရဲၣ်ကျဲၤကတီၤန့ၢ်ကၠိဖိအတၢ်သ့တၢ်ဘၣ်လၢကထီၣ်ဘၣ်ထံဂုၤကီၢ်ဂၤဖၠၣ်စိမိၤအဂီၢ်န့ၢ်လီၤ. ဆၢကတီၢ်ခဲအံၤ ၦၤလၢအဖျိထီၣ်(K-GED) ကၠိဝံၤတနီၤလဲၤထီၣ်ဘၣ်ကၠိလၢထံဂုၤကီၢ်ဂၤဖၠၣ်စိမိၤကၠိအဖၢမုၢ်န့ၣ် လီၤ. ဒီးတနီၤလၢတၢ်အိၣ်သးအကလုာ်ကလုာ်အဖီခိၣ်ကျိၣ်စ့တၢ်ဂ့ၢ်ကီမ့ၢ်ဂ့ၤဒီးလၢလံာ်ခီကီၢ်တၢ်ဂ့ၢ်ကီမ့ၢ်ဂ့ၤအဝဲ သ့ၣ် ဘၣ်အိၣ်ခိးတၢ်အိၣ်ဝဲဒၣ်တနီၤန့ၣ်ဒီးတနီၤမၤစၢၤက့ၤတၢ်လၢၦၤတဝၢပူၤန့ၣ်လီၤ.
