ကီၢ်ပယီၤကလုာ်ဒူၣ်ပီညါ တၢ်အိၣ်ဖှိၣ် အံၤ မ့ၢ်အိၣ်အိၣ်ဖှိၣ်လၢအကြၢးဝဲဘၣ်ဝဲ လၢတၢ်ကသူၣ်ထီၣ်တၢ်ဆဲးကျိးဆဲးကျၢလိာ်သးဒီးတၢ်ပာ်ဖှိၣ်မၤသကိးတၢ် လၢကီၢ်ပယီၤ ကလုာ်ဒူၣ်သ့ၣ်တဖၣ် ကဒဲကဒဲအဘၢၣ်စၢၤန့ၣ်လီၤ. တၢ်ရဲၣ်တၢ်ကျဲၤအံၤပာ်ဖျါထီၣ်ဝဲ တၢ်ယူးယီၣ်ပာ်ကဲဝဲ ကလုာ်ဒူၣ်ဖိသ့ၣ်တဖၣ်အတၢ်မ့ၢ်တၢ် လုၢ်လၢ်ထူသနူလီၤဆီသ့ၣ်တဖၣ် တကးဘၣ်ကဲဘျုးကဲဖှိၣ်စ့ၢ်ကီးလၢတၢ်ဟ့ၣ်ခီဟ့ၣ်လီၤလိာ်သးတၢ်ဖံးတၢ်မၤအတၢ်လဲၤခီဖျိ တၢ်ဘှါၡါတၢ်ဂ့ၢ်ကီအကျိၤအကျဲသ့ၣ်တဖၣ် လၢပီညါတၢ်ဖံးတၢ်မၤအပူၤန့ၣ်လီၤ.လၢတၢ်အိၣ်ဖှိၣ်ပူၤ ကညီကူၣ်သ့ဆဲးလၤဝဲၤကျိၤခၢၣ်စးတဖၣ်စ့ၢ်ကီးလဲၤထီၣ်ပၣ်ဖှိၣ်မၤသကိးတၢ် ဟံးန့ၣ်စ့ၢ်ကီးမူဒါလၢတၢ်ရဲၣ်တၢ်ကျဲၤအပူၤ ဒ်အမ့ၢ် တၢ်ပာ်ဖျါထီၣ်ဝဲကညီတၢ်ကူၣ်ဘၣ်ကူၣ်သ့အဂ့ၢ်အခၢးသ့ၣ်တဖၣ်ဒီးတကတီၢ်ဃီအိးထီၣ်စ့ၢ်ကီးဒီးတၢ်ကွၢ်ကီ(gallery)တစံးတက့ၢ်န့ၣ်လီၤ.ဒီးကညီကူၣ်သ့ဆဲးလၤဝဲၤကျိၤၦၤပၢဆှၢရဲၣ်ကျဲၤတၢ် လဲၤပၣ်ဃုာ်လၢအနီၢ်ကစၢ်ဒၣ်ဝဲ ၂ ဂၤလၢအမ့ၢ်ပတီၢ်ထီပီညါဝဲၤဒ့တၢ်ပၢဆှၢရဲၣ်ကျဲၤဝဲၤဒၢဂ့ၢ်ဝီမူဒါခိၣ် သရၣ်မုၣ်ဖီမူဒီး ဂ့ၢ်ခီၣ်ထံးပီညါဝဲၤဒ့တၢ်သိၣ်လိဝဲၤဒ့ပြံခိၣ်သရၣ်မုၣ်ချံးအိၣ်တဖၣ်န့ၣ်လီၤ.လၢန့ၣ်အမဲာ်ညါ,တၢ်ဆဲးကျိးဆဲးကျၢဒီးတၢ်ကတိၤန့ၢ်ခဲးတၢ်မူဒါခိၣ် သရၣ်သီသံၣ်စ့ၢ်ကီး ပၣ်ဃုာ်ပၣ်ဂီၢ်ဝဲလၢကလံၤကျါ(online)န့ၣ်လီၤ.(စကောကရင်)

တၢ်ပာ်ဖျါထီၣ်ကညီကူၣ်သ့ဆဲးလၤဝဲၤကျိၤ အဂ့ၢ်အခၢးသ့ၣ်တဖၣ် အံၤန့ၣ် ပတီၢ်ထီပီညါဝဲၤဒ့ တၢ်ပၢဆှၢရဲၣ်ကျဲၤဝဲၤဒၢးဂ့ၢ်ဝီဝဲၤဒ့ပြံခိၣ် ဟံးမူဒါဒီးပာ်ဖျါထီၣ်ဝဲန့ၣ်လီၤ. တၢ်ဂ့ၢ်လၢအဘၣ်တၢ်ပာ်ဖျါအီၤတဖၣ်ဘၣ်ထွဲ ကညီတၢ်ကူၣ်ဘၣ်ကူၣ်သ့အတၢ်အိၣ်ဂၢၢ်အိၣ်ကျၢၤ ဒ်အမ့ၢ် ပတီၢ်ထီပီညါ အတၢ်ဟူးတၢ်ဂဲၤတၢ်အိၣ်သး,ဝဲၤကျိၤပူၤဝဲၤဒ့သ့ၣ်တဖၣ်,ဒီးကညီတၢ်ကူၣ်ဘၣ်ကူၣ်သ့အတၢ်ကွၢ်ဆၢၣ်မဲာ်တဖၣ် န့ၣ်လီၤ.

တၢ်ကရၢကရိအဂ့ၢ်အခၢး လံာ်သ့ၣ်တဖၣ် တၢ်ပာ်လီၤဃာ်အီၤလၢ တၢ်ကွၢ်ကီ (gallery) အပူၤဒီးၦၤဟဲထီၣ်တၢ်အိၣ်ဖှိၣ်တဖၣ် တၢ်ဟ့ၣ်အီၤ အခွဲးလၢဟံးန့ၢ်ဖးဝဲသ့န့ၣ်လီၤ. ဒ်န့ၣ်အသိး တၢ်ကွၢ်ကီ(gallery)တၢ်ဟူးတၢ်ဂဲၤအံၤအတၢ်ပညိၣ်ဒ်သိးဒီးတၢ်ကသ့ၣ်ညါအါထီၣ်တၢ် ကရၢကရိအဂ့ၢ်အကျိၤ,တၢ်မုၢ်လၢ် ကွၢ်စိ,ဒီး တၢ်ကူၣ်ဘၣ်ကူၣ်သ့သနူသ့ၣ်တဖၣ် ဒ်သိးတၢ်ကရၢကရီကဒိးန့ၢ်ဘၣ်ဝဲ တၢ်သးဆၢၣ်ဆၢလၢ ၦၤဟဲထီၣ်တၢ်အိၣ်ဖှိၣ်သ့ၣ်တဖၣ်ဒီးထံဂုၤကီၢ်ဂၤၦၤတမှံၤတဖၣ် န့ၣ်လီၤ. (စကောကရင်)