ကလံၤထံး ကညီကၠိသရၣ်တၢ်သိၣ်လိခီလ့းကၠိ(Karen Teacher Training College -South)ကၠိပျၢ်အမူး

လါမးၡး ၁၃.၂ဝ၂၄,နံၤ ကလံၤထံး ကညီကၠိသရၣ်တၢ်သိၣ်လိခီလ့းကၠိ (Karen Teacher Training College -South) အိၣ်ဒီးတၢ်မၤလၤကပီၤ တၢ်ပျၢ်ကၠိအမူးန့ၣ်လီၤ. ၂ဝ၂၃-၂ဝ၂၄ တၢ်သိၣ်လိနံၣ်အံၤ ကၠိဖိဖျိထီၣ် ကၠိ ခဲလၢာ်(၇၂)ဂၤန့ၣ်လီၤ.

ပဝဲကညီကူၣ်သ့ဆဲးလၤဝဲၤကျိၤၦၤမၤသကိးတၢ်ဖိတဖၣ်ခဲလၢာ်ပသးခုဃုာ်ဒီးကၠိဖိလၢဖျိထီၣ်ကၠိတဖၣ် ဒိၣ်ဒိၣ်မုၢ်မုၢ်န့ၣ်လီၤ.ဒ်တၢ်ကတိၤဒိစံးဝဲ”ကၠိသရၣ်ဒုးအိၣ်ဖျဲၣ်ထီၣ်ထံကီၢ်ခိၣ်နၢ်”အသိးပနာ်လၢကၠိဖိလၢအဖျိထီၣ်ကၠိတဖၣ်ကက့ၤသိၣ်လိမၤယုၤက့ၤဖိဒံဖိသၣ်သ့ၣ်တဖၣ်ဒီးတဂၤစုာ်စုာ်ကဒုးအိၣ်ထီၣ်ဝဲတၢ်ဘျုးတၢ်ဖှိၣ်ဒိၣ်ဒိၣ်မုၢ်မုၢ်လၢၦၤတဝၢပူၤန့ၣ်လီၤ.ပပာ်သူၣ်ပာ်သးစ့ၢ်ကီးလၢ ကၠိဖိသ့ၣ်တဖၣ်မၤလိတၢ်ဆၢကတီၢ် ဘၣ်ကွၢ်ဆၢၣ်မဲာ်တၢ်အကလုာ်ကလုာ်ဒီးပပာ်ကဖၢလၢသးဒီးပာ်လၤပာ်ကပီၤကၠိဖိသ့ၣ်တဖၣ်လၢအဝဲသ့ၣ်တဖၣ်မၤနၢၤကွံာ်တၢ်တၢ်ကီတၢ်ခဲသ့ၣ်တဖၣ်ဒီးဖျိထီၣ်ဝဲကၠိဂ့ၤဂ့ၤန့ၣ်လီၤ.

ဒ်လီၢ်ကဝီၤတၢ်အိၣ်သးအသိး သုးကီးကးအသုး တၢ်ထီၣ်ဒုးအဃိဒီး ကၠိဖိ,ကၠိသရၣ်တဖၣ် တဘျီဘျီ ဘၣ် ဃ့ၢ်အိၣ်ကဒုလၢတၢ်ပူၤဖျဲးလီၢ်ဒီးမၤလိတၢ်တခီခီ လၢတၢ်ကီတၢ်ခဲပူၤဒၣ်လဲာ် အဝဲသ့ၣ်တဖၣ်ဟ့ၣ်လီၤသးလၢအဂ့ၤဒီးမၤဝဲလၢအဂ့ၤကတၢၢ်န့ၣ်လီၤ.အဒိၣ်အအါ ခိၣ်နၢ်လၢအရဲၣ်ကျဲၤန့ၢ်တၢ်လၢကၠိတၢ်လဲၤတရံးသးဂီၢ်တဖၣ်ဒီးကၠိဖိမိၢ်ပၢ်,ကၠိကမံးတံာ်ဒီးၦၤတဝၢခိၣ်နၢ် ဘၣ်မူဘၣ်ဒါလၢအကွၢ်ထွဲကၠိဖိတၢ်တၢ်ဘံၣ်တၢ်ဘၢ ဒ်သိးကၠိဖိတၢ်ဖံးလိမၤဒိးကအိၣ်လၢတၢ်ပူၤဖျဲးအဂီၢ် အဝဲသ့ၣ်အတၢ်သးစွံကတုၤလၢတၢ်ကူၣ်ဘၣ်ကူၣ်သ့အတၢ်ဖံးတၢ်မၤပူၤအံၤကဲထီၣ်ဝဲတၢ်ဒိတၢ်တဲာ်လၢအဂ့ၤလၢပဝဲကညီဒီကလုာ်ဂီၢ်ဒီး ဒုးအိၣ်ထီၣ်န့ၢ်တၢ်အခီၣ်တဃာ်တခါလၢထံလီၢ်ကီၢ်ပူၤ တၢ်ဒိၣ်ထီၣ်လဲၤထီ ဒီးတၢ်မုၢ်တၢ်ခုၣ်အဂီၢ်န့ၣ်ပစံးသ့န့ၣ်လီၤ.

ကညီဒီကလုာ်စၢဖှိၣ်ကရၢ အဖီလာ်ကီၢ်ရ့ၣ်နွံဘ့ၣ်အပူၤ ကညီကၠိသရၣ်တၢ်သိၣ်လိခီလ့းကၠိအိၣ်ဝဲ(၂)ဖျၢၣ်လၢအအိၣ်သူၣ်လီၢ်သးလၢ ကီၢ်ရ့ၣ်ဒူပျာ်ယာ်ဒီးကီၢ်ရ့ၣ်မုၢ်တြီၢ်ပူၤန့ၣ်လီၤ. ကၠိအံၤဒုးအိၣ်ထီၣ်န့ၢ်ဝဲကၠိသရၣ်ဂံၢ်ဘါအဒိၣ်အ အါလၢကီၢ်သူလ့ၤဒီတဘ့ၣ်အပူၤန့ၣ်လီၤ.