ကညီကူၣ်သ့ဆဲးလၤ၀ဲၤကျိၤ လဲၤဟးအိၣ်သကိးကီၢ်ရ့ၣ်ဒူသထူၣ်ပတီၢ်ထီပီညါကၠိ
၀၃/၀၆/၂၀၂၄ နံၤကညီကူၣ်သ့ဆဲးလၤ၀ဲၤကျိၤလီၢ်ခၢၣ်သးပှၤဘၣ်မူဘၣ်ဒါ,ကီၢ်ရ့ၣ်ပှၤဘၣ်မူဘၣ်ဒါဒီးကီၢ်ဆၣ် ဘံလ့ကူၣ်သ့ခိၣ် လဲၤဟးအိၣ်သကိးကီၢ်ရ့ၣ်ဒူသထူၣ်ပတီၢ်ထီပီညါကၠိန့ၣ်လီၤ.
လၢတၢ်ထံၣ်လိၥ်သးဒီးကၠိဖိအံၤ ကီၢ်ဆၣ်ကူၣ်သ့ခိၣ်ဟ့ၣ်သဆၣ်ထီၣ်ကၠိဖိသ့ၣ်တဖၣ်လၢကဂုၥ်ကျဲးစၢးလၢအ၀ဲသ့ၣ် တၢ်မၤလိမၤဒိးပူၤဒီး တကတီၢ်ဃီဒုးသ့ၣ်ညါတၢ်အိၣ်သးဘၣ်ထွဲလၢကီၢ်ဆၣ်ပူၤတၢ်အိၣ်သးဒီးဟ့ၣ်ကူၣ်ဟ့ၣ်ဖးကၠိဖိ သ့ၣ်တဖၣ်လၢတၢ်ဘံၣ်တၢ်ဘၢအဂီၢ်န့ၣ်လီၤ. လၢကီၢ်ရ့ၣ်တကပၤ ဟ့ၣ်သဆၣ်ထီၣ်ကၠိဖိဒီးဟ့ၣ်ဂံၢ်ဟ့ၣ်ဘါကၠိဖိလၢ တၢ်မၤလိမၤဒီးအဂီၢ်တၢ်ဖံးလိမၤဒီးအကျိၤအကျဲဒီးတၢ်ဟ့ၣ်ဒိဟ့ၣ်တဲၥ်တနီၤန့ၣ်လီၤ. လၢလီၢ်ခၢၣ်သးပှၤဘၣ် ပှၤဘၣ်မူဘၣ်ဒါတကပၤ ဒုးသ့ၣ်ညါကၠိဖိဘၣ်ထွဲလၢကညီကူၣ်သ့ဆဲးလၤဝဲၤကျိၤအဂ့ၢ် ၀ဲၤဒ့ဃုဒ့အတၢ်ဖံးတၢ်မၤတၢ် ဟူးတၢ်ဂဲၤတဖၣ်လ့ၤတုၤလ့ၤတီၤဒီးဒုးသ့ၣ်ညါစ့ၢ်ကီးကၠိဖိလၢအ၀ဲသ့ၣ်မ့ၢ်ဖျိထီၣ်ပတီၢ်ထီပီညါဝံၤ တၢ်ဆဲးမၤလိၣ်အါ ထီၣ်ပတီၢ်ထီပညါလၢထံလီၢ်ကီၢ်ပူၤမ့ၢ်ဂ့ၤဒီးထံဂုၤကီၢ်ဂၤမ့ၢ်ဂ့ၤန့ၣ်လီၤ. ဒုးသ့ၣ်ညါထွဲစ့ၢ်ကီးကၠိဖိသ့ၣ်တဖၣ်ဘၣ်ထွဲ လၢဂ့ၢ်ခီၣ်ထံးတၢ်ကစီၣ်တၢ်သ့ၣ်ညါနၢ်ပၢၢ်န့ၣ်လီၤ.
တၢ်လဲၤဟးအိၣ်သကိးကၠိတဘျီအံၤတၢ်ပညိၣ်လၢ ကၠိဖိသ့ၣ်တဖၣ်ကမၤလိဘၣ်တၢ်လၢ အပှဲၤဒီးတၢ်ဘံၣ်တၢ်ဘၢလၢ နီၢ်ခိမ့ၢ်ဂ့ၤဒီးလၢနီၢ်သးမ့ၢ်ဂ့ၤန့ၣ်မ့ၢ်ပတၢ်ပညိၣ်တခါစ့ၢ်ကီးန့ၣ်လီၤ. ဒ်သိးဒီးကၠိဖိသ့ၣ်တဖၣ်ဖဲအဖျိထီၣ်ကၠိ၀ံၤအလီၢ်ခံ ကမၤတၢ်လၢပှၤတဝၢအဂီၢ်မ့ၢ်ဂ့ၤဒီးကဆဲးမၤလိတၢ်မ့ၢ်ဂ့ၤကထံၣ်စိ၀ဲ အတၢ်ပညိၣ်သ့ၣ်တဖၣ်ဖျိဖျိဖျါဖျါအဂီၢ်န့ၣ်လီၤ.
