တၢ်မၤလၤကပီၤ ကညီဒီကလုၥ်လုၢ်လၢ်ထူသနူ လါခူးကံၢ်စုမုၢ်နံၤအမူးဖဲ တူၢ်လၢၢ်သ၀ီ ကီၢ်ဆၣ်ကစၢၢ်ဒိၣ်, ကီၢ်ရ့ၣ်ဘျံးဒ၀ဲၢ်န့ၣ်လီၤ.
လါအီကူၥ် ၁၆/၂၀၂၄ နံၤတၢ်မၤလၤကပီၤ ကညီဒီကလုၥ်လုၢ်လၢ်ထူသနူ လါခူးကံၢ်စုမုၢ်နံၤအမူးဖဲ တူၢ်လၢၢ်သ၀ီ ကီၢ်ဆၣ်ကစၢၢ်ဒိၣ်, ကီၢ်ရ့ၣ်ဘျံးဒ၀ဲၢ်န့ၣ်လီၤ. ကၠိလၢဟဲမၤလၤကပီၤ တၢ်ရဲၣ်တၢ်ကျဲၤအံၤဒ်အမ့ၢ်ဝဲ တူၢ်လၢၢ်ညၣ် မီၤထၣ်ကၠိ, တူၢ်လၢၢ်(ထံမဲးဘီကၠိ)ဒီးပီချိကညီတီၤခၢၣ်သးကၠိသ့ၣ်တဖၣ်န့ၣ်လီၤ. ဒီးဒူသ၀ီအါဖျၢၣ်ဖဲပီချိဟီၣ်က၀ီၤအံၤ ဟဲထီၣ်မၤသကိးလုၢ်လၢ်ထူသနူလါခူးကံၢ်စုမုၢ်နံၤအမူးအံၤန့ၣ်လီၤ. ပှၤဟဲပၥ်ဖှိၣ်သးခဲလၢၥ်ကအိၣ်လၢ ၃၀၀ ဘျဲၣ်ဂၤန့ၣ်လီၤ. တၢ်ရဲၣ်တၢ်ကျဲၤအံၤဘၣ်တၢ်တီခိၣ်ရိၣ်မဲအီၤလၢလီၢ်ကဝီၤခိၣ်နၢ်ဒီးကၠိကမံးတံၥ်သ့ၣ်တဖၣ်န့ၣ်လီၤ.
တၢ်ဟူးတၢ်ဂဲၤဒ်အမ့ၢ် ကၠိဖိဒုးနဲၣ်တၢ်ဒိတၢ်တဲၥ်ဒီး တၢ်ကဂဲၤကလံၣ်ဒိသ့ၣ်တဖၣ် ဘၣ်တၢ်မၤစ့ၢ်ကီးအီၤဖဲမူးတၢ်ရဲၣ်တၢ်ကျဲၤအံၤန့ၣ်လီၤ.
တၢ်မၤလၤကပီၤ ကညီဒီကလုၥ်လုၢ်လၢ်ထူသနူ လါခူးကံၢ်စုမုၢ်နံၤအမူးအံၤ တၢ်ပညိၣ်ဒ်သိးပဝဲကညီဖိတဖၣ်ကဟံးဃၥ်က့ၤလုၢ်လၢ်ထူသနူအံၤဒီးမၤယုၤပဖိပလံၤသ့ၣ်တဖၣ်ဒ်သိးကသ့ၣ်ညါက့ၤဒီးပၢၤဃၥ်ဟံးဃၥ်က့ၤပလုၢ်လၢ်တၢ်ဆဲးတၢ်လၤတဖၣ်အံၤ အဂ့ၢ်လီၢ်က၀ီၤခိၣ်နၢ်ပၥ်ဖျါ၀ဲန့ၣ်လီၤ.
