ဖဲလါဒံၤစ့ဘၢၤ ၁၆-၂၂/၁၂/၂ဝ၂၃ နံၤ, တၢ်မၤဝဲဒၣ်ကၠိဖိအတၢ်ဟူးတၢ်ဂဲၤလၢအမ့ၢ်တီၤဖုၣ်ကၠိအတၢ်ရ့လိာ်မုာ်လိာ်သးဖဲသဝီကလဲးဖးဒိၣ် ,ကမီၤသွ့ ဟီၣ်ကဝီၤ,ကီၢ်ဆၣ်လၢၢ်ဒိၣ်စိ,ကီၢ်ရ့ၣ်ဘျံးန့ၣ်လီၤ.တီၤဖုၣ်ကၠိအတၢ်ရ့လိာ်မုာ်လိာ်တၢ်ဟူးတၢ်ဂဲၤတဖၣ်မၤဝဲ တၢ်ဂဲၤလိာ်ကွဲပြၢဒ်အမ့ၢ်ဖျၢၣ်ထူ,ဖျၢၣ်ၦီၢ်,တၢ်စံၣ်ပျံၤ,ဖျၢၣ်ဃးသ့ၣ်တဖၣ်န့ၣ်လီၤ.ကၠိသရၣ်,သရၣ်မုၣ်တဖၣ်စ့ၢ်ကီးအိၣ်ဒီးတၢ်ဂဲၤလိာ်ကွဲပြၢလၢအမ့ၢ်(Basketball)န့ၣ်လီၤ.ကၠိဟဲပာ်ဖှိၣ်ထီၣ်သးခဲလၢာ်(၁၄)ဖျၢၣ်န့ၣ်လီၤ.
လၢတၢ်ဟူးတၢ်ဂဲၤတဘျီအံၤအတၢ်ပညိၣ်ဒ်သိးကၠိဖိတဖၣ်ကအိၣ်ဒီးတၢ်သူၣ်ဆူၣ်သးဂဲၤအါထီၣ်လၢအတၢ်တၢ်ဖံးလိမၤဒိးပူၤ,ဒ်သိးၦၤတဝၢဒီးဒူသဝီမိၢ်ပၢ်သ့ၣ်တဖၣ်စ့ၢ်ကီးကသ့ၣ်ညါအါထီၣ်ကညီကူၣ်သ့ဆဲးလၤဝဲၤကျိၤဒီးကၠိတဖၣ်ကမၤသကိးတၢ်အါထီၣ်အဂီၢ်န့ၣ်လီၤ.မ့ၢ်စ့ၢ်ကီးဒ်သိးကီၢ်ဆၣ်,ဟီၣ်ကဝီၤပူၤကၠိသ့ၣ်တဖၣ်တဖျၢၣ်ဘၣ်တဖျၢၣ်ကအိၣ်ဒီးတၢ်သးစၢၢ်ဆၢတမံၤဃီ,ကမၤသကိးဘၣ်တၢ်ဒီးကၠိသရၣ်,သရၣ်မုၣ်ဒီးကၠိဖိတဖၣ်ကအိၣ်ဒီးတၢ်ရ့လိာ်မုာ်လိာ်သးဘူးဘူးတံၢ်တံၢ်ကသ့အဂီၢ်န့ၣ်လီၤ.
