၂၃.၃.၂ဝ၂၄, မုၢ်နၤ ၁ဝးဝဝနၣ်ရံၣ်ဘျဲၣ်ဒီး ၁၁းဝဝနၣ်ရံၣ် အဆၢကတီၢ်န့ၣ်သုးကီၣ်ကး ကဘီယူၤအိၣ်ဒီးတၢ်ပညိၣ်လိၤလိၤဒီးခးလီၤတၢ်လၢ ဃီဖိပျဲၢ်တီၤခၢၣ်သးကၠိ(#1069) သဝီဃီဖိပျဲၢ်, ကီၢ်ဆၣ်ဘံလ့,ကီၢ်ရ့ၣ်ဒူသထူၣ်န့ၣ်လီၤ. ကဘီယူၤခးလီၤတၢ်အကျါကျိချံတပိၢ်ဖးဒ်ဘၣ်အိၣ်စ့ၢ်ကီးန့ၣ်လီၤ. တၢ်ခးလီၤတၢ်တဘျီအံၤ ကၠိတၢ်သူၣ်ထီၣ်ဟးဂီၤကွံာ်ဝဲ(၃)ဖျၢၣ်,ကၠိတၢ်ပီးတၢ်လီအလုာ်ကလုာ်ဒ်အမ့ၢ်ခူၣ်ကွဲးလံာ်သ့ၣ်တဖၣ်, လံာ်မိၢ်ၦၢ်, စိၣ်လၣ်(Solar), ဘဲၤထြံၤ (Battery)

, လီမ့ၣ်အူပျံၤဒီးကယဲၢ်တၢ်အိၣ်လၢအပူၤသ့ၣ် တဖၣ် ဟးဂီၤ ကွံာ်ဝဲခဲလၢာ်ဒီး ၦၤကမျၢၢ်ဟံၣ်လီၤၦီၢ်ကွံာ်ဝဲတဖျၢၣ် အဂ့ၢ်သ့ၣ်ညါဘၣ်န့ၣ်လီၤ.

လီၢ်ကဝီၤၦၤဘၣ်မူဘၣ်ဒါတဂၤစံးဝဲ”ကၠိတၢ်သူၣ်ထီၣ်သၢဖျၢၣ်အံၤ လီၤဆီဒၣ်တၢ်(၂)ဖျၢၣ်အကျါတၢ်သူၣ်ထီၣ်လီၤၦီၢ်ဝဲဒီးဘၣ်တဲအလီၢ်တအိၣ်လၢၤဘၣ်တၢ်ပီးတၢ်လီသ့ၣ်တဖၣ်ဟးဂီၤကွံာ်ဝဲခဲလၢာ်န့ၣ်လီၤ…လီၤဆီဒၣ်တၢ်ကၠိတၢ်သူၣ်ထီၣ်အဂၤတဖျၢၣ်အပူၤတၢ်ပီးတၢ်လီဒ်အမ့ၢ်ခူၣ်ကွဲးလံာ်စှၤဖျၢၣ်သူအီၤကသ့ဒံးဝဲဒီးအခိၣ်ဒုးလီၤၦီၢ်ဝဲဒီးနံၣ်လၢကဟဲတနံၣ်တၢ်မၤလိအဂီၢ် သိၣ်လိတၢ်လၢအပူၤတသ့ၣ်လၢၤနီတစဲးဘၣ်”.

ကၠိတၢ်သူၣ်ထီၣ်ဟးဂီၤအံၤမ့ၢ်ဘၣ်က့ၤသူၣ်ထီၣ်က့ၤအသီန့ၣ် ကလၢာ်ဝဲစ့အါအါဂီၢ်ဂီၢ်ဒီးကလီၤဘှံးလီၤတီၤဒိၣ်ဒိၣ်ကလဲာ်အဂ့ၢ် လီၢ်ကဝီၤၦၤဘၣ်မူဘၣ်ဒါစံးဝဲန့ၣ်လီၤ.

သုးဟံးန့ၢ်ဆူၣ်တၢ်စိတၢ်ကမီၤဝံၤအလီၢ်ခံ လၢကညီဒီကလုာ်စၢဖှိၣ်ကရၢဟီၣ်ကဝီၤပူၤ ကဘီယူၤဟဲခးလီၤတၢ် မ့ၢ်ဂ့ၤဒီးတၢ်ခးစိကျိဖးဒိၣ်မ့ၢ်ဂ့ၤအိၣ်ကဲထီၣ်သးတလီၢ်လီၢ်န့ၣ်လီၤ. ဒီးလီၤဆီဒၣ်၂ဝ၂၄အတီၢ်ပူၤ ကဘီယူၤဟဲခးလီၤတၢ်လၢလီၢ်ကဝီၤပူၤ အဘျီအါထီၣ်ဝဲဒီးအစၢၤဒုးထီၣ်ဝဲန့ၣ်လီၤ.လၢတၢ်အံၤအဖီခိၣ်ကဲထီၣ်တၢ်တံာ်တာ်လၢကညီကူၣ်သ့ဆဲးလၤဝဲၤကျိၤတဖၣ်ဖံးတၢ်မၤဒိၣ်ဒိၣ်မုၢ်မုၢ်န့ၣ်လီၤ.

ၦၤတဝၢဖိသ့ၣ်တဖၣ်မုၢ်လၢ်ဝဲလၢတၢ်ကတြီဆၢတၢ်ဟးတ့ၢ်လီၤတၢ်ဒီးကဘီယူၤမ့ၢ်ဂ့ၤဒီးတၢ်ခးစိကျိဖးဒိၣ် လၢကမျၢၢ်ကျါသ့ၣ်တဖၣ်န့ၣ်လီၤ. တၢ်ကဲထီၣ်သးအံၤကဲထီၣ် တၢ်သူၣ်အုးသးအုးလၢကညီကူၣ်သ့ဆဲးလၤဝဲၤကျိၤအဂီၢ်ဒီးဆၢမုၢ်လၢ်လၢတၢ်ကပတုာ်က့ၤလၢအချ့န့ၣ်လီၤ.