ကူၣ်သ့ဆဲးလၤဝဲၤကျိၤ တၢ်မၤသကိး ကီၢ်သူလ့ၤတၢ်သူၣ်သ့ၣ်မုၢ်နံၤ
ဖဲလါယူၤလံအတီၢ်ပူၤ တၢ်ပၥ်ပနီၣ်အီၤဒ်ကီၢ်သူလ့ၤ တၢ်သူၣ်သ့ၣ်အလါအသိး တနံၣ်အံၤ ၂ဝ၂၄, လါယူၤလံ ၁သီတုၤ ၃၁ သီ, ကညီကူၣ်သ့ဆဲးလၤဝဲၤကျိၤ လၢကၠိ, ကီၢ်ဆၣ်, ကီၢ်ရ့ၣ်ဒီးလီၢ်ခၢၣ်သးသ့ၣ်တဖၣ် ပၥ်လုၢ်ပၥ်ၦ့ၤဒီးပၥ်ဖှိၣ်မၤသကိး သူၣ်ဖျးဝဲသ့ၣ်တဖၣ်လၢ အလီၢ်က ဝီၤဒၣ်စုၥ်စုၥ်ဝဲန့ၣ်လီၤ.
ကီၢ်သူလ့ၤတၢ်သူၣ်သ့ၣ်အလါအံၤ ဘၣ်တၢ်မၤအီၤဖဲ လါယူၤလံအတီၢ်ပူၤ လၢကီၢ်သူလ့ၤဟီၣ်ကဝီၤ ပကထံဘၣ် အီၤအါလၢ ကညီကလုၥ်ဒူၣ်တဝၢပူၤ လၢကီၢ်ပယီၤမုၢ်ထီၣ်ကလံၤထံးန့ၣ်လီၤ. ကီၢ်သူလ့ၤတၢ်သူၣ်သ့ၣ်အတၢ်ဟူးတၢ်ဂဲၤအံၤ ဘၣ်တၢ်စးထီၣ်မၤအီၤလၢၦၤလီၢ်ကဝီၤဖိတဖၣ် တၢ်ပညိၣ်လၢ တၢ်သူၣ်ထီၣ်သ့ၣ်ၦၢ်ဒီးတၢ်ကတီၤခိၣ်ဃၢၤန့ဆၢၣ်န့ၣ်လီၤ. လၢတၢ်ဟူးတၢ်ဂဲၤအံၤ ညီနုၢ် ကၠိသ့ၣ်တဖၣ်,ၦၤတဝၢ, တၢ်ကရၢကရိဒီးလီၢ်ကဝီၤၦၤဘၣ်မူၣ်ဘၣ်ဒါတဖၣ်ပၥ်ဖှိၣ် ထီၣ်အသးဒီး သူၣ်သကိးသ့ၣ်ဒီးကတိၤသကိးဝဲလၢတၢ်ပၢၤဃၥ်ခိၣ်ဃၢၤန့ဆၢၣ်အတၢ်တၢ်ရ့ဒိၣ် အဂ့ၢ်စ့ၢ်ကီးန့ၣ်လီၤ.
ဒ်န့ၣ်အသိး ဖဲဟီၣ်ခိၣ်ဒီဖျၢၣ်တၢ်သူၣ်သ့ၣ်မုၢ်နံၤသ့ၣ်တဖၣ်န့ၣ် တၢ်ဟ့ၣ်တၢ်သ့ၣ်ညါနၢ်ပၢၢ်ဘၣ်ဃးသ့ၣ်တဖၣ် အရ့ဒိၣ်ဒ်လဲၣ်ဒီးဟ့ၣ်ဂံၢ်ဟ့ၣ်ဘါၦၤလၢ တၢ်ကသူၣ်သ့ၣ် ဒ်သိးတၢ်ကပတုၥ်ကွံၥ် တၢ်မၤဟးဂီၤၦၢ်, မူခိၣ်ကလံၤသီၣ် ဂီၤတၢ်ဆၢကတီၢ်ဆီတလဲ ဒီး တၢ်ဒုးလလဲလိၥ်ဒီးတၢ်ဒုးစှၤလီၤခိၣ်ဃၢၤန့ဆၢၣ်တဖၣ်န့ၣ်လီၤ.
ဟီၣ်ခိၣ်ဒီဘ့ၣ်တၢ်သူၣ်သ့ၣ်တၢ်ဟူးတၢ်ဂဲၤသ့ၣ်အိၣ်ဝဲအကလုၥ်ကလုၥ်ဒီးတၢ်မၤအီၤမုၢ်နံၤသ့ၣ်တဖၣ်လီၤဆီလိၥ်သးန့ၣ်လီၤ. ဘီမုၢ်စၢဖှိၣ်တၢ်အိၣ်ဖှိၣ် ၂ဝ၁၂နံၣ်န့ၣ် ဘိးဘၣ်ရၤလီၤဝဲ လါမးၡး ၂၁သီ,မ့ၢ် ဟီၣ်ခိၣ်ဒီဖျၢၣ်သ့ၣ်ၦၢ်မုၢ်နံၤ န့ၣ်လီၤ. မုၢ်နံၤအံၤတၢ်မၤလၤကပီၤဒီးတၢ်ဟ့ၣ်တၢ်သ့ၣ်ညါနၢ်ပၢၢ်ဘၣ်ဃးသ့ၣ်ၦၢ်သ့ၣ်တဖၣ်အရ့ဒိၣ်ဒ်လဲၣ်အဂ့ၢ်န့ၣ် လီၤ. ဖဲမုၢ်နံၤအံၤမ့ၢ်တုၤလီၤ တၢ်ဟ့ၣ်ဂံၢ်ဟ့ၣ်ဘါဝဲလီၢ်ကဝီၤသ့ၣ်တဖၣ်, ထံကီၢ်သ့ၣ်တဖၣ်ဒီးဟီၣ်ခိၣ်ဒီဘ့ၣ်မ့ၢ်ဂ့ၤ လၢကမၤတၢ်ဟူးတၢ် ဂဲၤသ့ၣ်တ ဖၣ်လၢဘၣ်ထွဲလၢ တၢ်ကတီၤသ့ၣ်ၦၢ်သ့ၣ်တဖၣ်ဒီးတၢ်ကတီၤသ့ၣ်မုၢ်ဝၣ်ဘိသ့ၣ် တဖၣ် ဒ်အမ့ၢ်တၢ်သူၣ် သ့ၣ် မုၢ်ဝၣ်ဘိသ့ၣ်တဖၣ်န့ၣ်လီၤ. ဒ်န့ၣ်အသိး ဟီၣ်ခိၣ်ဖျၢၣ်မုၢ်နံၤ ဘၣ်တၢ်မၤလၤကပီၤအီၤကိးနံၣ် ဒဲးဖဲ လါအ့ဖြ့ၣ် ၂၂သီန့ၣ်လီၤ. ဟီၣ်ခိၣ်ဒီဘ့ၣ် ခိၣ်ဃၢၤန့ဆၢၣ်မုၢ်နံၤ ဘၣ်တၢ်မၤအီၤဖဲ လါယူၤ ၅သီန့ၣ်လီၤ. မုၢ်နံၤသ့ၣ်တဖၣ်အံၤ တၢ်ဟူးတၢ်ဂဲၤဒ်အမ့ၢ်တၢ်သူၣ်သ့ၣ်မုၢ်ဝၣ်ဘိတဖၣ်ပၣ်ဃုၥ်ဝဲ စ့ၢ်ကီးန့ၣ်လီၤ.
